كلمة واحدة ؟؟

من طرف **روح الاسلام** الخميس 01 نوفمبر 2007, 9:17 am

[color:7875=red

]السلام عليكم ورحمة الله
متخافوش..مش هتكلم عن البلهارسيا لأن بيتهيألى انقرضت من زمان، لكن
هتكلم عن حاجه اخطر منها بكتييييير أوى، دا من وجهة نظرى الشخصيه، يعنى ممكن ما تكملوا الكلام للآخر وتمشوا( دا أنا كنت أوريكو شغلكوا لو حد عملهامعايا ومشى).

كلامى موجه للشباب أكثر من البنات ،إللى عارفه انهم هيكرمشوا وشهم دلوأت ويبصوا بنظرات غريبه كدا لما يعرفوا الموضوع عن إيه.

من غير ما أطول عليكوا فى المقدمه،أنا بس عاوزه أسأل سؤال خانئنى، إيه الحكمه أو الجمال فى إنك تبآ ماشى ولا قاعد وطالع منك كدا سحابة دخان؟؟ كان نفسك تطلع قطار فحم؟ الحمد لله انهم لغوه علشان بيلوث البيئه. طب إيه؟ نفسك تبآ قريب الرنجه؟! على اساس انها سمك مدخن وحضرتك شخص مدخن بردو من نفس العيله، وتصور ان مع الوقت بيكون فى شبه كبير بين المدخنيين والرنجه! الاتنين مسلوعيين ومسنفين ولونهم غامق وريحتهم مش حلوه،وبردو الاتنين من غير سنان خالص.

مش بؤول لكوا ان الكلام مش هيعجبكوا؟ طب اصبروا شوى واستحملونى للآخر..ممكن؟،،،أشكركم

قريت ان سيدنا محمد عليه الصلاة والسلام عمره ما أكل ثوم أو بصل فى حياته علشان الريحه وكان بيقول :"إن الملائكه تتأذى مما يتأذى منه البشر"وفى ملكين معانا بشكل مستمر دا غير اللى بيحضرونا وقت الصلاه او وقت ما نذكر ربنا؛فمكنش ينفع أبداً انه صل الله عليه وسلم يؤذيهم بالريحه البشعه دى، تخيلوا حَرَم نفسه من حلال ربنا انزله وكمان مفيد جداً للصحه علشان ما يؤذى الملائكه،طب نقول إيه فى إللى بيؤذيهم عن عمد وبريحه فظيعه مش برتروح بسهوله، طب هتعمل إيه لما تيجى تصلى؟؟ لازم تغسل سنانك بالمعجون أو بالسواك أو تتمضمض بالبيتادين ع الاقل، واحتمال الريحه متروحش كمان.حاجه صعبه أوى.خلاص...بَطَل سجاير وأمرك لله

هؤولك على حاجه تانيه...من السُنَه انك لمّا تدخل على أهل بيتك تسلم عليهم وتُقَبِلهُم"تبوسهم يعنى"، طب إزاى وريحتك كدا؟؟ جايز انت مش واخد بالك لأنك اتعودت، بس فعلاً اللى بيقعد جنبك بيلؤطها أوى،تخيل نفسك بآ بتميل على حد تبوسه يروح هو باعد عنك..يا عينى ع الكبسه،ولو ما بعد يبآ بيجاملك وجاى على نفسه. طب هتعمل إيه؟ تحط معجون وفرشه وغيار نضيف عند البواب علشان توضب نفسك قبل ما تدخل البيت،أو تتخلى عن العاده الجميله دى فى الترحيب بأهل بيتك..أو الحل التانى....بردو تبطَّل سجاير وأمرك لله.

بحس ان الغير مدخن عايشه كدا عادى وعلى راحته، بيبتسم ويضحك أوى،معندهوش سنان صفرا يخبيها او يتكسف منها، أخينا اللى شغال من زمان بآ تلاقيه بيضحك "لجوه" ولو الضحك غلبه أوى وفته بؤه، تحس ان فى كهف اتفتح فجأه فى وشه وكمان ريحته غريبه، يعنى كهف وساكن فيه تنين كمان.يبآ يا يبطل يضحك يا يبطل سجاير

أنا طبعاً مش بشرب سجاير..بس كل يوم والله أرجع البيت أشم ريحتها فى هدومى كلها،وبتجيلى منين؟؟ مش عارفه، أنا لو مكان ماما كنت شكيت فىَّ ، أومال المدخن الحقيقى بقا حالته إيه؟؟

طب سيبك من الكبار..ممكن يستحملوا،،لكن تعالى بقا ع الصغننيين، لو عندك نونو عسوله كدا فى البيت وهجمت عليه تقطعه م البوس بريحتك دى، هيعمل ايه المسكين ولا هيعترض ازاى؟ هيصرخ ويعيط لما ينفطر ومع الوقت هيتعود ويطلع لك مدخن صغنن تربية ايدك يا فندم،، والله حرام،مش هقترح عليك حلول المره دى بس بُص فوق

ممكن أسأل حضرتك سؤال..سجايرك مصرى ولا مستورد؟ هم الاتنين اسوأ من بعض بس قضا أخف من قضا.

يعنى السجاير بتاعتنا دى لو الملكه كليوباترا والأميره ميريت يعرفوا ان اساميهم هتتحط عليها كانوا اتبروا منها، اراهنك لو حتى فيها النُص فى الميه نيكوتين اللى بيؤولوا عليه ده، دى جواها نشارة خشب وقش،لو جارت عليك الظروف وقعدت جنب واحد بيدخنها ممكن يغمى عليك،هم مش بيدخنوا علشان يعملوا دماغ؟ يتكيفوا يعنى..دى بقا مافيهاش ريحة المزاج،يعنى لو راح شم دخان قش الأرز المحروق هيعمل دماغ ويتكيف اكتر من كدا.

جايز حضرتك مُرَّتَبَك كبير ومش عارف تعمل بيه ايه ولا إيه فبتدخن مستورد؟؟ يبقا ربنا يسامحك بجد؛لأن 30% من ارباح الشركات دى بيروح للبرامج العسكريه والتسليح فى بلادها وييجوا يجربوها فينا فى فلسطين والعراق وسوريا وايران واحنا بعدهم وجايز معاهم ان شاء الله من غير مقاطعه،يعنى بنتبهدل وننطحن بفلوسك،اؤولك إيه بس؟!؟

مسكت علبة سجاير كدا شكلها حلو وبنت ناس ،قلت أشوف ايه بيعجبكوا فيها..احتمال الشكل، طب جايز عقدة الخواجه لأنها مستورده؟ يبآ أكيد بتكره نفسك وحياتك والدنيا علشان دا إللى بتأكده عبارة"التدخين يؤدى إلى الوفاه" ،وكمان المكونات إللى على العلبه آل "قطران ونيكوتين" ،اسمع ان الزفت والقطران دى حاجات بيرصفوا بيها الطريق مش بتتشرب، أمَّا بقا النيكوتين فلو محتاجله أوى ممكن تاكل "بتنجان" باذنجان يعنى،أعلى نسبة نيكوتين طبيعى موجوده فيه، يعنى هيظبط دماغك ومن غير دخان ولا ريحه.

قلبت الموضوع فى عقلى على كل الإتجاهات مش لاقيه ولا حاجه تقنعنى بالتدخين ده ولا إن المُدخِن معذور لأنه اتعود، دا بيبآ مدمن حاجات وحشه وبيتعالج مش حتة سجاره يعنى،ومش هؤولك بآ"قوة إراده" وكلام مستفز من ده علشان معدش بيجيب معاكو فايده.

بينى وبينكوا انا بزعل أوى لما بشوف حد كويس ويعتبر نموذج وقدوه فى حاجات كتيير وعنده العيب الخطير ده، وممكن العيب ده ينزله من درجة الكمال البشرى إللى ممكن يوصل له، يعنى لو حد ناجح أوى أوى ومتميز وأخلاقه فوق الممتازه ومتدين ووسيم بس...بيدخن،هنا بقا ترجع لأول السطر وتنزل درجات كتيير من الصفات إللى فاتت يعنى العباره هتكون (مش ناجح أوى وعادى مش متميز ووسامته فين دى مع اسنانه إللى بتصفر وبشرته إللى بتغمق وصوابعه إللى بتتحرق وعيونه إللى بتغبش من كتر ما اتعود يغمضها والدخان طالع عليها) أنا ما أقدرش أحكم فى الأخلاق والدين..بس كفايه انه عارف ان السجاير "معصيه" بإجماع كل الشيوخ وبردو مصمم عليها، وبيلغى إرادته ويتبع مزاجه يعنى هواه، والإسلام مفيهوش "هوى"، ربنا بيقول:"فإن لم يستجيبوا لك فأعلم أنما يتبعون أهواءهم ومَن أضلُ ممَ اتبع هواه بغيرِ هدىً من اللهِ إنَّ اللهَ لا يهدى القومَ الظالمين" وأُعيذُكُم ونفسى أن نكون منهم أبداً يا رب

بتؤول انك بتتعصب لما تبطلها وبتتنرفز بسرعه..طيب فين أخلاقك العاليه وصبرك وحلمك مع الناس ومع نفسك، دى كلها تهيؤات.صدقنى..(مَن ترك شيئاً فى سبيل الله أبدله الله خيراً منه) خليك عندك يقين وواثق فى كدا،وربنا هيساعدك والله.

هؤول حاجه ممكن تزعلكوا بس معلش...اعتقد ان اللى بيدخن لازم يكون حد جاهل-آسفه فى الكلمه- بس مينفعش حد عارف ومتعلم ومثقف وعرف الاضرار بتاعتها وانها حرام ولساه بيدخن..صح؟؟

ابسط حاجه كان عملها عند أول معلومه انه ياخد العلبه وع التوليت عدل يفرفطها ويفتح عليها السيفون ويكون ده مكانها الطبيعى الى الأبد.

أنا مش عاوزه أكون غلست عليكوا بكلامى ،والله غصب عنى لأنى فعلاً بحبكوا وبتمنى لكم الصحه وطولة العمر مع كل إللى تحبوهم،صحيح كل حاجه بإييد ربنا وفى مدخنين بيوصلوا ال90 سنه بس احنا لازم ناخد بالأسباب.

لو شفت الفرق بين رئة الشخص الطبيعى والمدخن هتترعب، أنا فكرتها صورة صخره فى البحر من الحاجات الخضره والبنى والزرقا اللى مبقعه فيها.ربنا يعافينا جميعاً يا رب

فى واحد وهو بيموت بدل ما يرفع صوبعه السبابه بالشهاده رفع السبابه والوسطى إللى كان بيمسك بيهم السجاره، والله جد، انا ما أتجرأ واقول انه كدا اشرك بالله لا قدر الله، بس الرسول بيقول "من عاش على شئ مات عليه ومن مات على شئ بُعِثَ عليه" هيؤول ايه ده لسيدنا محمد وربنا لما يسألوه هو رافع صوابع الاتنين ليه؟؟حاجه تكسف

ممكن تعمل اتفاق مع نفسك..فلوس السجاير بتاعة كل يوم دى حوشها واكسب بيها ثواب، يا إما تشترى بيها هديه لمامتك او زوجتك اللى كنت بتؤذيهم من غير قصد، او تحطهم كل شهر فى حساب مستشفى سرطان الأطفال كأنك بتؤول لهم "أنا آسف إنى كنت بساهم فى زيادة معاناتكم بدخان السجاير" او فكر انت فى اى حاجه كويسه.

تعرفوا ان "لندن" نجحت فعلاً فى مشروع "لندن بلا دخان" طبعاً دخان السجاير بس، وكمان "مكه المكرمه" والحمد لله بدءوا المشروع ده وان شاء الله يتحقق .يعنى انت كمان ممكن تنجح وبمنتهى السهوله لو "نويت وعقت العزم" وربنا مش هيكسفك ان شاء الله

دى كلمتى..قلتهالكو علشان فعلاً بحبكم فى الله، ربنا يهديكم ويهدينا يا رب ويجعلنا من المهتدين

"إنَّك لا تهدى مَن أحببت ولكن الله يهدى مَن يشاءُ وهو أعلمُ بالمهتدي" يعنى إللى عندهم استعداد

صحيح هى كلمه بس طىيله حبتين،سامحونى لو غلست عليكو،بس انا متعوده افضفض معاكو

هكون فى منتهى السعاده لو عرفت انكم اعادتم النظر والتفكير فى الحكايه دى وهتزيد سعادتى أكتر لو جت لكم الجرأه وبطلتوا تدخين فعلاً.

من طرف **smooth criminal** الخميس 01 نوفمبر 2007, 11:11 am

علي فكره انتي كلامك جميل اووووي ومنظم وواقعي
والحمد لله انا مش بادخن وربنا ما يكتبها علينا انشاء الله
انا باكره اي بني ادم بيفكر بس انه يدخن لدرجه اني عملت بحث كبير اووي علي التدخين في مضمون دراستي باشكرك اووووي اوي علي مشركتك وتنبيهك لانها فعلا اخطر من اي مرض في الدنيا
تحياتي

كلمة واحدة ؟؟

كلمة واحدة ؟؟

رد: كلمة واحدة ؟؟